華映娛樂股份有限公司

勢破千萬票房慶功
《29+1》再闖台北加國兩電影節

原著彭秀慧舞台劇及由她自編自導、周秀娜 (Chrissie)和鄭欣宜(Joyce)主演的《29+1》，在港、澳兩地上映至今兩個星期，票房截至昨日為止已接近一千萬，這部從小劇場延伸到大銀幕的作品能奪此票房數字，且好評好潮，確實成績不錯，所以電影公司將於本月底舉行慶功宴，慰勞台前幕後所有人員。

《29+1》票房口碑雙贏之餘，更多次入圍世界各地的國際影展及電影頒獎禮(詳見備註)，繼彭秀慧日前在法國尼斯國際影展擊敗12位勁敵、勇奪外語片最佳導演殊榮後，《29+1》本周再打孖傳喜訊，成為《2017台北電影節》「亞洲稜鏡」( Asian Prism ) 單元，以及於6月25日在加拿大舉行的第15屆 Female Eye Film Festival 獲提名最佳外語電影。
《29+1》再度打入台北及加國兩地電影節，彭秀慧感到十分榮幸，她說：「好多謝有呢個機會帶住套戲去唔同嘅地方參加電影節或者影展，對我嘅意義係親眼見到唔同地方嘅觀眾對呢部戲嘅反應，同埋會碰上唔同地方嘅電影人。我帶住呢部戲去過美國、日本、法國，嚟緊加拿大係一個我未去過嘅地方，台北係一個我非常鍾意嘅地方，所以我好開心因為呢部戲而再有機會去認識當地嘅人，亦都令我深深感受電影同劇場嘅分別，因為完成部電影之後，可以帶住佢周圍走，但舞台劇就要用唔同嘅方式。」
Joyce聞悉喜訊後亦很鼓舞，「梗係好開心啦，《29+1》入到台北電影節，又喺加拿大呢個地方有電影節嘅提名，希望能夠有好成績，始終我哋係香港嘅電影，希望可以為港增光。」

周秀娜則說：「當然好開心啦，之前導演攞咗尼斯影展嘅外語片最佳導演，再加埋入到台灣同埋加拿大嘅電影節，嚟緊《29+1》喺內地上映，我覺得係打咗枝好大嘅強心針，原來喺好多唔同地方生活嘅人，都感受到呢個作品入面嘅message。我覺得去到咁多唔同嘅影展，大家都鐘意，可以知道《29+1》對於一個女仔甚至乎係男性，佢哋內心嘅狀態同擔憂，可以帶到出嚟，佢哋能夠明白嘅話，我覺得係對我哋呢部戲嘅導演、演員，係最好最好嘅一枝強心針。」

備註：
《29+1》電影榮譽
1、《 香港亞洲電影節2016 》閉幕禮電影
2、美國《 Sedona International Film Festival 》榮獲「導演評審獎：最佳劇本獎」
3、《大阪亞洲電影節2017》壓軸大獎「觀客賞」。
4、入選克里夫蘭國際電影節（Cleveland International Film Festival）。
5、法國尼斯國際影展 ( NICE International Film Festival )，彭秀慧榮獲外語片最佳導演。
6、入圍《2017台北電影節》「亞洲稜鏡」( Asian Prism ) 單元。
7、加拿大第15屆 Female Eye Film Festival 獲提名最佳外語電影。